Eritrea ayaa Golaha Ammaanka ee Qaramada Midoobay ka codsatay inuu cambaareeyo Itoobiya, isla markaana qaado tallaabooyin looga hortagayo dagaal ay sheegtay in Addis Ababa isku diyaarinayso. Wasiirka Arrimaha Dibadda Eritrea, Osman Saleh, ayaa dalbaday in tallaabooyin laga qaado Itoobiya iyadoo la adeegsanayo Qodobka 7-aad ee Axdiga Qaramada Midoobay, kaas oo oggolaanaya cunaqabatayn iyo tallaabooyin kale oo amni.
Dalabkan ayaa yimid kaddib markii Itoobiya ku eedaysay Eritrea inay ciidamadeedu gudaha u galeen gobolka Tigray, eeddaas oo Asmara ay beenisay.
Dhanka magaalada Adigrat, oo ku dhow xadka Eritrea, ciidamada dowladda Itoobiya iyo maleeshiyaad xulafadooda ah ayaa Sabtidii gudaha u galay magaalada, sida ay Reuters u sheegeen dad deggan halkaas. Si kastaba, Reuters ma xaqiijin in ciidamada Itoobiya ay si buuxda ula wareegeen gacan ku haynta magaalada.
Xaaladda ayaa weli kacsan, waxaana labada dal ay Qaramada Midoobay u gudbiyeen eedeymo iska soo horjeeda, iyadoo laga cabsi qabo in xiisaddu isu beddesho dagaal toos ah.
