Warar cusub ayaa kasoo baxaya saddex markab oo bishii Nofeembar 2024 lagu qabtay biyaha Eritrea, kuwaas oo sida la sheegay u rarnaa Itoobiya. Sida ay warbaahinta Itoobiya maanta baahisay, maraakiibtaan ayaa waday hub iyo walxaha qarxa oo loogu talagalay diyaaradaha aan duuliyaha lahayn (drones) sida warar kala duwan lagu helay balse weli dowladaha ay xaaladan ka dhaxeyso si rasmi ah ugama hadlin.
Maraakiibtaan, oo lagu sheegay inay ka yimaadeen Azerbaijan, ayaa la qabtay iyagoo aan fasax haysan oo ay soo galeen biyaha dalka Eritrea , sida ay horey u shaacisay dowladda Eritrea. Ilaa hadda, ma jiro war rasmi ah oo kasoo baxay Eritrea oo la xiriira waxa ku jiray rarka la qabtay.
Warbixinada qaar ayaa tilmaamaya in Ra’iisul Wasaare Ku-xigeenka Itoobiya, Temesgen Tiruneh, uu bishii Sebtembar 2024 booqasho ku tegay Azerbaijan, taas oo sii xoojinaysa shaki ku saabsan xiriirka arrintan la xiriira.
Dhinaca kale, warbaahinta Anchor Media, oo fadhigeedu yahay Maraykanka, ayaa sheegtay in maraakiibtan ay u socdeen xeebaha Jabuuti, balse lama xaqiijin karo inay si toos ah uga soo baxeen Azerbaijan ama meel kale.
Xukuumadda Azerbaijan ayaa horey u sheegtay in maraakiibtaaan ay u socdeen Isutagga Imaaraadka Carabta (UAE) iyagoo marinaya Kanaalka Suweys, balse ay sababo la xiriira cimilo xun darted ugu leexdeen biyaha Eritrea.
Sida lagu sheegay warbixin laga helay warbaahinta Aze ee Azerbaijan, 3-da Markab oo wadata calanka Azerbaijan, ayaa bishii Nofeembar ka baxay Kanaalka Suweys kuna sii jeeday Abu Dhabi.
Wali, dowladda Itoobiya wax war ah kama soo saarin maraakiibtan iyo rarkooda. Wuxuu arrintan yeelan kartaa saameyn diblomaasiyadeed, maadaama xiriirka dalalka gobolka uu marayo xaalad xasaasi ah.
