Wasaaradda Maaliyadda ee Maamulka SSC-Khaatumo ayaa soo saartay warqad rasmi ah oo lagu caddeynayo fududeynta jidmaraka gaadiidka ka dhex shaqeeya deegaanada SSC-Khaatumo, Puntland iyo Dowlad Deegaanka Soomaalida (DDS). Qoraalkan oo loo diray masuuliyiinta heer gobol iyo degmo, laamaha amniga, iyo waaxyaha ganacsiga iyo gaadiidka, wuxuu xooga saaraya sidii loo yareyn lahaa caqabadaha dhaqaale iyo farsamo ee hor taagan ganacsiga iyo isku socodka bulshada.
Qodobada Muhiimka ah ee Go’aanka:
- Wasaaradda Maaliyadda SSC-Khaatumo ayaa ogolaatay fududeynta adeegyada kastamada ee gaadiidka isku goosha Puntland iyo DDS, si loo dhiirrigeliyo dhaqaalaha iyo ganacsiga.
- Waxaa la qaaday khidmadaha gaadiidka goosha, taasoo qayb ka ah dadaalka lagu yareynayo culayska dhaqaale ee saaran ganacsatada.
- Gaadiidka la baxaya badeecadaha ganacsiga sida gaasta, xoolaha iyo khudaarta, ayaa laga dhaafay canshuuraha qaarkood.
- Kastamada iyo goobaha baaritaanka waxaa lagu amray in ay dadajiyaan hubinta gaadiidka, gaar ahaan kuwa xambaarsan shidaalka iyo gaasta, si loo yareeyo halista khataraha suurtagalka ah.
- Shaqaalaha kastamada waxaa la faray in ay si qadarin leh ula dhaqmaan darawallada iyo ganacsatada.
- Guddiyada iskaashatooyinka gaadiidka ayaa lagu amray inay dhaqan galiyaan qodobadan si loo sugo nidaamka cusub.
Go’aankan ayaa qeyb ka ah qorshaha maamulka SSC-Khaatumo ee lagu xoojinayo isku socodka ganacsiga iyo fududeynta xiriirka dhaqaale ee ka dhexeeya bulshada ku nool gobolladaasi. Masuuliyiinta ayaa ku dhiirrigeliyay dhammaan laamaha dowladda iyo ganacsatada inay ka faa’iideystaan fursadaha ay bixisay wasaaradda.
Waxaa la filayaa in tallaabadani ay saameyn muuqata ku yeelato dhaqaalaha gobolka, iyadoo la rajeynayo in ay kor u qaaddo isku socodka ganacsiga iyo adeega gaadiidka.
