Maalin kadib markii Madaxweynaha Soomaaliya, Xasan Sheekh Maxamuud, iyo Ra’iisul Wasaaraha Itoobiya, Abiy Axmed, ay kulmeen addisababa ayaa wafdi ka socda labada dal ayaa wadahadallo farsamo ka bilaabay Ankara. Ujeeddada wadahadalladan ayaa ah hirgelinta Heshiiskii Ankara iyo ka wada-hadalka damaca Itoobiya ee ah inay hesho marin badeed. Wasiirka Warfaafinta Soomaaliya, Da’uud Aweys, ayaa sheegay in wafdiga Soomaaliya ay diiradda saarayaan dhaqan-gelinta heshiisyadii hore.
Wadahadalladan ayaa imaanaya xilli Itoobiya ay weli raadineyso marin ganacsi oo badeed, taasoo abuurtay xiisad siyaasadeed. Bishii Janaayo 2024, Itoobiya iyo Somaliland ayaa kala saxiixday heshiis is-afgarad oo Itoobiya u ogolaanaya inay hesho marin 19km ah muddo 50 sano ah. Heshiiskaas ayaa sababay falcelin adag oo ka timid dowladda federaalka Soomaaliya, taasoo ku tilmaantay mid baalmarsan madaxbannaanideeda dhuleed.
Dowladda Soomaaliya waxay ku adkeysaneysaa in wax heshiis ah oo la xiriira badda Soomaaliya lagu gali karo oo kaliya ogolaanshaha Dowlada Soomaalyia , islamarkaana uu waafaqsan yahay sharciga caalamiga ah. Hadda, labada wafdi farsamo ayaa qiimeynaya suurtagalnimada in Itoobiya hesho marin badeed iyadoo la hoos keenayo kormeerka dowladda Soomaaliya.
Turkiga, oo xiriir dhow la leh Soomaaliya, ayaa horey u dhex-dhexaadiyay khilaafaadka gobolka, gaar ahaan Heshiiskii Ankara ee la gaaray December 2024. Inkastoo aan si rasmi ah loo caddeyn doorkiisa hadda, Ankara ayaa martigelineysa wadahadalladan cusub, taasoo muujineysa muhiimadda ay siinayso arrimaha Geeska Afrika.
Natiijada wadahadalladan waxay saameyn weyn ku yeelan doontaa xasiloonida gobolka. Haddii heshiis la gaaro, waxaa la filayaa in iskaashiga dhaqaale iyo nabadda gobolka ay horumar sameeyaan. Haddii la isku afgaran waayo, xiisadda ayaa sii xoogeysan karta, taasoo fursad siin karta kooxaha xagjirka ah sida Al-Shabaab oo inta badan ka faa’iideysta khilaafaadka siyaasadeed.
