Safaaradda Talyaaniga ee Soomaaliya, oo ku taalla Muqdisho, ayaa ku dhawaaqday inay dib u eegis ku samaynayso diyaar garowgeeda farsamo ka hor inta aanay gaarin go’aan muhiim ah oo ku saabsan dib u bilaabidda bixinta fiisaha ee dadka haysta baasaboorka Soomaaliya sanadka 2025. Safiirka Talyaaniga ee Soomaaliya, Pier Mario, ayaa xaqiijiyay arrintan mar uu wareysi gaar ah bixiyay , isagoo muujiyay rajo ku aaddan horumar laga gaaro sannadkan. Wuxuu intaas ku daray in hakinta hore ee ku timid bixinta fiisaha ay sabab u ahayd “arrimo farsamo iyo nidaam.”
Bishii Sebtembar 2024, dowladda Talyaaniga ayaa ku dhawaaqday inay joojisay bixinta fiisaha Schengen ee laga bixin jiray safaaradda ay ku leedahay Muqdisho. Qoraal ay safaaradda Talyaaniga ee Nairobi soo dhigtay barta X (Twitter) ayaa lagu sheegay in la hakiyay bixinta fiisaha Schengen ee dhammaan codsiyada ay qabato safaaradda Talyaaniga ee Muqdisho, iyada oo aan la sheegin sababta rasmiga ah ee ka dambeysa go’aankan.
Go’aankan ayaa saameyn ku yeeshay muwaadiniinta Soomaaliyeed ee doonayay inay u safraan dalalka Yurub, maadaama fiisaha Schengen uu fududeeyo isu-socodka 27 waddan oo Yurub ah. Dib u eegistan cusub ee safaaradda Talyaaniga ayaa laga filayaa inay horseeddo dib u bilaabidda bixinta fiisaha, taas oo noqon doonta war wanaagsan oo soo dhaweyn leh.
