Madaxweynihii hore ee Soomaaliya, Maxamed Cabdullahi Farmaajo, ayaa war-saxaafadeed ka soo saaray dagaalka maanta ka dhacay deegaanka Raaskambooni, kaas oo dhexmaray ciidamo Soomaaliyeed oo walaalo ah. Farmaajo ayaa sheegay in dagaalku uu muujinayo xaaladda adag ee dalka iyo dhaawaca soo gaaray dowlad-dhiska Soomaaliya.
Warsaxaafadeedka ayaa lagu sheegay in dagaalka uu ku saleysan yahay argagixisada dhibaatooyinka ku haysa dadka Soomaaliyeed, iyo sida ciidamadu ugu baahan yihiin taageero dheeraad ah si loo xoreeyo dalka. Farmaajo ayaa sidoo kale ka hadlay caqabadaha soo wajahday ciidamada xoogga dalka Soomaaliyeed, isagoo sheegay in hoggaaminta xumida iyo dagaallada aan qorsheysnayn ay wiiqeen awooddooda.
Madaxweynihii hore ayaa ka digay in wax-ka-beddelka sharci darrada ah iyo laalidda Dastuurka ay keeni karaan colaado sokeeye oo dib u celinaya dowlad-dhiska Soomaaliya. Farmaajo wuxuu ugu baaqay madaxda iyo hoggaamiyayaasha siyaasadda, gaar ahaan Madaxweyne Xasan Sheekh, inay ku laabtaan dhabbaha sharciga ah oo ay ka fogaadaan go’aanada aan loo dhammeystirin ee wiiqaya midnimada iyo wadajirka shacabka.
Ugu dambeyntii, Farmaajo ayaa ku baaqay in dhammaan qaybaha bulshada, culimaa-uddiinka, waxgaradka iyo hoggaamiyeyaasha siyaasadda ay u istaagaan ilaalinta Dastuurka, xoojinta nabadda iyo xasilloonida, si wadajir looga gudbo caqabadaha haysta dalka, oo ay ugu horreyso wiiqidda awoodda ciidamada, laalidda dastuurka, musuqmaasuqa iyo hubanti la’aanta siyaasadeed.
