Dawladda Federaalka Soomaaliya ayaa si adag cambaaraynaysa falka xadgudubka ah ee ciidamada Itoobiya ka geysteen magaalada Doolow, gobolka Gedo, sida ku xusan war-saxaafadeed ay soo saartay Wasaaradda Arrimaha Dibadda. Ciidamada Itoobiya ayaa weerar lama filaan ah ku qaaday saldhigyo ay ciidanka Soomaaliya ku leeyihiin degmada Doolow, iyagoo beegsaday saddex xarumood oo ay ku sugnaayeen Ciidanka Xoogga Dalka, Nabad-sugidda NISA, iyo Booliska.
Weerarku wuxuu sababay dil iyo dhaawac u geystay xubno ka tirsan ciidamada Soomaaliya iyo muwaadiniin rayid ah oo goobta ku sugnaa. Falkan xadgudubka ah ayaa lagu soo beegay xilli dowladda Soomaaliya ay ku jirto dadaallo nabadeed oo lagu xoojinayo heshiiskii Ankara, taasoo ay la socotay wafdi u ambabaxay Addis Ababa.
Dawladda Soomaaliya waxay ka digaysaa in tallaabooyinkan aan la aqbali karin ay halis gelinayaan nabad-ku-wada-noolaanshaha gobolka, waxaana ay caddeyneysaa inaysan ka aamusi doonin falalkan xadgudubka ku ah madaxbannaanida Soomaaliya.
