Howlgalka Hilaac ee Puntland ay ka waddo Buuraha Calmiskaad, halkaas oo ay fariisimo ku lahaayeen dagaalyahannada Daacish, ayaa xalay 16-ka Febraayo 2025 la kulmay duqeymo ay fuliyeen ciidamada Mareykanka iyo kuwa Isutagga Imaaraadka Carabta. Weerarradan ayaa lala beegsaday goobo muhiim ah oo la rumeysan yahay inay ahaayeen xarumo ay kooxda kaga gambato duullaannada iyo meelo ay ku diyaariyaan qaraxyada iyo miinooyinka.
Gelinkii dambe ee shalay, diyaaradaha dagaalka ee Imaaraadka ayaa duqeymo culus ka fuliyay deegaanada ku teedsan Togga Jaceel, oo ah goob ay dagaalyahannadu ku sugnaayeen. Weerarradaas ayaa si gaar ah uga dhacay Xaankooki oo u dhow Dhasaan. Dhinaca kale, xalay fiidkii ayaa diyaaradaha Mareykanka waxay duqeeyeen Godka Kunle oo u dhow Daramadow.
Goobahaas la beegsaday ayaa la tilmaamayaa inay yihiin xarumo kooxda Daacish ay ku diyaarin jirtay weeraro ay la damacsanayd in ay ka fuliso gudaha Puntland iyo meelo kale. Inkasta oo aan weli si rasmi ah loo xaqiijin khasaaraha ka dhashay duqeymaha, haddana waxaa la rumeysan yahay in bartilmaameedyadu ahaayeen kuwo si gaar ah loo ogaa.
Horaantii bishan, Mareykanka ayaa sheegay in duqeyn uu ka geystay Buuraleyda Calmiskaad lagu dilay sarkaal sare oo ajaanib ah, kaasoo kooxda u qaabilsanaa howlaha muhiimka ah.
Dowladda Puntland ayaa uga mahadcelisay Mareykanka iyo Imaaraadka duqeymahan, iyada oo sheegtay in ay gacan ka geysanayaan sii socoshada howlgalka. Dhanka kale, Dowladda Federaalka Soomaaliya ayaa war ay soo saartay ku sheegtay in ay ka war haysay duqeymaha Mareykanka oo ay kala shaqeysay howlgalka.
Tan iyo markii uu bilowday howlgalka Hilaac, kooxda Daacish ayaa lumisay dhul istiraatiiji ah oo ku yaalla Buuraha Calmiskaad, waxaana laga dilay dagaalyahanno badan oo ajaanib ah. Sidoo kale, waxaa la xaqiijiyay in dagaalkaas uu khasaaro gaarsiiyay dhinacyada ku lugta leh howlgalka.
